Зэрыпщаф1э, зэрышхэ 1эмэпсымэхэр

Бэлагъ – зэрыпщафIэ, шхын къызэрыралъхьэ Iэмэпсымэ; и теплъэкIэ пхъампэшхуэщ – пIастэ, мэрамысэ, жэмыкуэ, кхъуейжьапхъэ щащIкIэ иризэIащIэ.
Бедакъ – пхъэ пэгун; псы кърахь, ирахъумэ.
Бжэмышх – зэрышхэ Iэмэпсымэ; шху, шатэ хуэдэхэр зэрашхыращ – пхъэм, къупщхьэм къыхащIыкIыу щытащ.
Гуэгуэн – псы къызэрахь Iэмэпсымэ; быдз зимыIэ къубгъэнышхуэ формэщ, гъуаплъэм къыхащIыкIыу щытащ.
Гухъу – пщафIэ Iэмэпсымэ; хужьгъэр, нартыхур ягъавэн ипэкIэ зрагуращ.
Дзасэ – зэрыпщафIэ Iэмэпсымэ; гъущIым, пхъэм къыхащIыкIа баш папцIэ кIыхьщ, лы, лэкъум ирагъажьэу. Дэпым ирагъэуурэ лы зрагъажьэм дзасэшхуэкIэ йоджэ; лэкъум, тхъурыжь иризэрагъэдзэкIыурэ зрагъажьэм дзасэ цIыкIукIэ йоджэ.
Жыгун – зэрыпщафIэ Iэмэпсымэ; къу зытемым шыуан, и лъащIэмкIэ нэхъ псыгъуэу – лы, джэш хуэдэхэр ирагъавэ.
Жьэпхъалъэ – зэрыпщафIэ Iэмэпсымэ; къу зиIэ гъуаплъэ тебэ щIылъэныкъуэ – лъэхъшым фIадзэри лэкъум, тхъурыжь, хъыршын хуэдэхэр ирагъажьэ.
КрушкIэ – кIы зиIэ гъущI Iэгубжьэ; псы ирофэ.
Къащыкъ – шхын ткIуаткIуэ къызэрагъахъуэ Iэмэпсымэ: теплъэкIэ хъуп инщ, кIы къэгъэша кIыхь фIэту.
Къыр-къыр – псы зэрызэрахьэ, зэрефэ Iэмэпсымэ; Iэлъэныкъуэ кхъуэщын пщэ псыгъуэ цIыкIуу – псы къыщижкIэ «къыр-къыр» жиIэрти, и цIэр къызытекIар аращ.
Лэгъуп – зэрыпщафIэ Iэмэпсымэ; лы, пIастэ хуэдэхэр ирагъавэу гъуаплъэ шуанышхуэ, и лъащIэр захуэу.
Лъахъш – зэрыпщафIэ Iэмэпсымэ; адыгэ жьэгум шыуан, лэгъуп хуэдэхэр – лъахъшэуи лъагэуи – зэрыщыфIадзэ цепщ.
Пэгун – псы къызэрахь, зэрахъумэ Iэмэпсымэ; къэнджал лэгъуп псыгъуэ куу – пхъэхьым пэгунитI фIэдзауэ дамэкIэ псы къахьу щытащ.
ПэрыIэбэ – унагъуэ Iэмэпсымэ; жьэгу, хьэку мафIэм ирихоIэбэ, пхъэхэр зэщIэдзэжын, дэп къращтэн щхьэкIэ.
Пхъампэ – зэрышхэ Iэмэпсымэ; джэдыкIэ имывыкIар зрашх бэлагъ жьгъей – пхъэм е къупщхьэм къыхащIыкIыу щытащ.
Сэ – зэрыпщафIэ Iэмэпсымэ; щIакхъуэ, чыржын, лы, балыджэ, хъарбыз хуэдэхэр ираупщIатэ.
Стэчан – абдж Iэгубжьэ; шей, шэ, псы, фадэ хуэдэхэм ирофэ.
Тэбакъ – зэрышхыкI Iэмэпсымэ; пхъэ тепщэч хъуреишхуэ – Iыхьэ-Iыхьэу гуэша шхыныгъуэхэр илъу Iэнэ трагъэувэрт.
Тебэ – зэрыпщафIэ Iэмэпсымэ; чыржын, щIакхъуэ, дэлэн, кIэртIоф, лы хуэдэхэр ирагъажьэ.
Тебэкъытех – пщафIэ Iэмэпсымэ; тебэ пщтырыр, IэкIэ емыIусэу, къызэрытрахыж Iэдэщ.
Тепщэч (е сыхьэн) – зэрышхыкI Iэмэпсымэ; дэшхын зыхагъапщIэ шхыныгъуэхэр (лыбжьэ, кхъуейжьапхъэ хуэдэхэр) Iэнэм иритрагъэувэ.
Тхъууалъэ – пщафIэ Iэмэпсымэ; пхъэ пэгун псыгъуэ кIыхьым шатэр иракIэ, щхьэумэ зыфIэт быш кIыхьыр ирахух – къыдрахьеижурэ шатэр зэрахуэ, тхъу цIынэрэ ерэну зэщIэкIыху.
Убалъэ – унагъуэ Iэмэпсымэ; бжьыныху зрауб пхъэ, жэз кумб.
Ужьгъэ – пхъэ щхьэл цIыкIу; хур иракIутэри яужь-хужьгъэурэ къыщIокIыж.
Фалъэ – зэрефэ Iэмэпсымэ; зэфэ шхыныгъуэхэр (лэпс, къалмыкъшей, хьэнтхъупс, махъсымэ хуэдэхэр) Iэнэм иритрагъэувэ.
Фэндырэ – псы зэрызэрашэ Iэмэпсымэ; пхъэ бошкIэ, псы икIапIи къигъэжыпIи иIэу.
Фошыгъулъэ – абдж вазэ, фошыгъу, кIэнфет хуэдэхэр Iэнэм иритрагъэувэу.
Хупхъэ – зэрыпщафIэ Iэмэпсымэ; бжьиз пхъэ яе – тхьэв ирихаху.
Хъуп – зэрышхэ Iэмэпсымэ; лъэпс хьэптхъупс, къалмыкъшей хуэдэхэм ирофэ – нобэ лошкIэ жыхуаIэм ещхьщ.
Чей – шхын зэрахъумэ Iэмэпсымэ; зи щхьэр Iуха фэндырэ, кхъуей, къэбыстэ, нащэ хуэдэхэр ирашу.
Шейбжэмышх – зэрышхэ Iэмэпсымэ; шейм фошыгъу ирихадзэ, шатэ, фо, варенэ хуэдэхэр ирашх, пхъампэ папщIэуи къагъэсэбэп.
Шейныч – зэрыпщафIэ Iэмэпсымэ; щхьэтепIэ, къу, быдз зиIэ лэгъуп лIэужьыгъуэщ, фошыгъу шей ирагъавэ.
Шолъпэ (е чымчыр) – зэрыпщафIэ, шхын къызэрыралъхьэ Iэмэпсымэ; и теплъэкIэ гъуанэ куэд зиIэ къащыкъ чэнжщ.
Щыгъулъэ – щыгъу зрэхъумэ кумбыгъэ (ипэкIэ фэлъыркъэбыр щыгъулъэу къагъэсэбэру щытащ); шыгъур Iэнэм зэрытрагъэувэ е шхыным зэрыхаудэ Iэмэпсымэщ.
Шынакъ – зэрефэ Iэмэпсымэ; кIы зыпыт фалъэ – фошыгъушейм инэмыщI адрей зэфэ шхыныгъуэхэр Iэнэм иритрагъэувэ.
Шыплъэ – зэрефэ, зэрышхыкI Iэмэпсымэ; шыпс, шатэ хуэдэхэр Iэнэм зэрытрагъэувэ пхъэ фалъэ быхъу цIыкIу.
Шыуан – зэрыпщафIэ Iэмэпсымэ; лы, хьэнтхъупс, джэшыпс, кхъуейжьапхъэ, пIастэ хуэдэхэр ирагъавэ – жыгун лэгъуп лъащIэ хъурей.
Iэнэ – зытешхыкI Iэмэпсымэ; лъакъуищкIэ уву пхъэ стIол хъурей; ипэкIэ адыгэр зытешхыкIыу щытаращ.
Iэпс (е Iэгубжьэ) – зэрефэ Iэмэпсымэ; фадэ гуащIэ е псы зэрефэ пхъэ стэчан.